TUZO YA MWALIMU NYERERE YA UANDISHI BUNIFU INALENGA KUKUZA LUGHA YA KISWAHILI - PROF. MKENDA

Waziri wa Elimu, Sayansi na Teknolojia Prof. Adolf Mkenda amesema Tuzo ya Taifa ya Mwalimu Nyerere ya Uandishi Bunifu 2023/24 inalenga kukuza lugha ya Kiswahili, kutangaza na kuhifadhi utamaduni wa Kitanzania.

Waziri Mkenda amesema hayo Novemba 18, 2024 jijini Dar es Salaam akizungumza katika kipindi cha Jambo Tanzania TBC, amesema Serikali ilianzisha Tuzo hizo kumuenzi Hayati Baba wa Taifa Mwalimu Julius Nyerere na kutambua mchango wake katika kuhamasisha usomaji na ukuaji wa Lugha ya Kiswahili.

Ameongeza kuwa pamoja na azma hiyo Serikali imedhamiria kuhamasisha ushiriki wa Waandishi bunifu kuwania Tuzo hizo ili kukuza uandishi na kuchangamsha Soko la vitabu nchini.

"Tunapokuwa na vitabu vizuri, vilivyoandikwa kwa Kiswahili, tunaamini watu watavipenda, hivyo tungepenga tuwe na Waandishi wengi ambao baadae vitabu vyao vitatafsiriwa kwa lugha mbalimbali na kutangaza utamaduni wetu" Alisema Prof. Mkenda.

Amewahimiza Waandishi bunifu kuwasilisha miswaada kuwania Tuzo hizo zinazoshindaniwa katika tanzu za Riwaya, Ushairi, Hadithi za Watoto, na Tamthilia.

"Nia yetu ni kurejesha ari ya kuandika na kusoma ndio maana moja ya zawadi ya Tuzo ni kuchapisha miswada na kusambaza katika shule vyuo na maktaba zetu nchini" amesema Mkenda

Ameeleza kuwa Kamati imeongeza muda wa kupokea Miswada hivyo Dirisha la kuwasilisha litakuwa wazi hadi Disemba 31, 2024,

Waandishi Bunifu mnakaribishwa kushiriki katika Tuzo ya Taifa ya Mwalimu Nyerere ya Uandishi Bunifu 2024/25.