Rais Mstaafu Dkt. Kikwete na Afisa Mtendaji Mkuu wa GPE Wakoshwa na Utekelezaji Mradi

Mwenyekiti wa Bodi ya Wakurugenzi wa Shirika la Ushirikiano wa Elimu Duniani (GPE), Mheshimiwa Dkt. Jakaya Mrisho Kikwete, Rais Mstaafu wa Jamhuri ya Muungano wa Tanzania, pamoja na Afisa Mtendaji Mkuu wa GPE, Bibi Laura Frigenti, leo wametembelea na kukagua shule za Msingi ya Maji Matitu iliyoko Mbagala na Mikongeni iliyoko Gongo la Mboto jijini Dar es salaam.

Katika ziara hiyo, iliyofanyika siku tatu kabla ya mkutano wa Bodi ya GPE utakaofanyika Zanzibar kuanzia mapema wiki ijayo, wamejionea shule ambazo Shirika hilo limefadhili miradi ya ujenzi wa Madarasa, Vyoo na Mafunzo endelevu ya Walimu kazini na kueleza kuridhishwa na utekelezaji.

Katika shule ya Maji Matitu shirika hilo limefadhili ujenzi wa madarasa nane na matundu 20 ya vyoo, wakati katika shule ya Mikongeni imechangia ujenzi wa madarasa mawili na matundu sita ya vyoo.

Akiongea baada ya ziara hiyo, Dkt. Kikwete ameishukuru serikali ya Tanzania kwa kuendelea kushirikiana na GPE katika kuboresha sekta ya elimu hususan elimu kwa wasichana na kuahidi kuendelea kuunga mkono juhudi na mikakati ya kuiendeleza sekta hiyo.

Dkt. Kikwete, ambaye ni Mwafrika wa kwanza kuongoza GPE, amesema shirika hilo hadi sasa limeishaipatia Tanzania jumla ya Dola za Kimarekani Milioni 332 (takriban shilingi 834,980,332,000.00) ili kusaidia sekta ya elimu bara na visiwani.

Kwa upande wake Afisa Mtendaji Mkuu wa GPE Frigenti ametoa wito kwa wadau wa maendeleo kuendelea kusaidia juhudi za kuendeleza sekta ya Elimu katika nchi zenye uhitaji, akisisitiza kwamba changamoto nyingi za kimaisha zinaweza kuepukika endapo wananchi watapatiwa elimu bora.

Fringeti ameipongeza serikali kwa kuendelea na juhudi zake za kuendeleza elimu kwa kujenga miundo mbinu bora na kuhakikisha kila mtoto anapatiwa haki ya elimu na kwa kuweza kufanya mageuzi makubwa ya elimu.

Katika ziara hiyo Viongozi hao waliambatana na Naibu Waziri wa Elimu Sayansi na Teknolojia Mhe. Omar Kipanga na Naibu Waziri wa Nchi Ofisi ya Rais Tawala za Mikoa na Serikali za Mitaa Mhe. Deo Ndejembi pamoja na Naibu Katibu Mkuu WyEST Dkt. Franklin Rwezimula.