Saturday, 04 May 2019 09:02

RAIS DKT. MAGUFULI AWEKA JIWE LA MSINGI UJENZI MAKTABA YA CHUO KIKUU CHA SAYANSI NA TEKNOLOJIA MBEYA NA KUZUNGUMZA WANAFUNZI WA VYUO VIKUU VILIVYOKO MBEYA

Rais wa Jamhuri ya Muungano wa Tanzania Mhe. Dkt. John Pombe Joseph Magufuli ameweka jiwe la msingi la ujenzi wa Maktaba ya Chuo Kikuu cha Sayansi na Teknolojia Mbeya itakayokuwa na uwezo wa kuchukua wanafunzi 2500 kwa wakati mmoja na inayogharimu shilingi Billion 5.5.

Akizungumza na wafanyakazi na wanafunzi wa Vyuo Vikuu vyote vilivyoko jijini Mbeya baada ya kuweka jiwe la msingi Rais Dkt. Magufuli ameipongeza Wizara ya Elimu, Sayansi na Teknolojia na uongozi wa MUST kwa kuenzi mawazo ya Baba wa Taifa Hayati Mwalimu Julius Kambarage Nyerere kwa kukiendeleza Chuo cha hicho ambacho kilianza mwaka 1986 kama Chuo cha Ufundi na hatimae mwaka 2012 kuwa Chuo Kikuu pekee cha Sayansi na Teknolojia nchini.

Rais Magufuli pia amekipongeza chuo kwa kutoa mchango mkubwa kwa jamii ikiwemo kushiriki katika kusimamia kama wataalamu elekezi katika mradi wa ukarabati wa shule kongwe, Vyuo vya Ualimu na ujenzi wa Mji wa Serikali Dodoma.

Pamoja na pongezi Rais Magufuli ameutaka uongozi wa Chuo hicho na Wizara kuhahakikisha jengo la Maktaba linakamilika kwani limechelewa na amewahakikishia kutoa fedha zilizobaki kiasi cha shilingi bilioni 2.9 mwezi wa huu wa tano ili kukamilisha kazi hiyo kwa haraka. Katika hatua ingine ametoa shilingi Bilioni 5 kwa ajili ya ujenzi wa mabweni huku akiagiza chuo kutumia wataalamu wake wa ndani kufanya kazi hiyo.

“ nawapongeza lakini jengo hili limechukua muda mrefu sana miaka saba, sasa hakikisheni linakamilika na Chuo Kikuu Mzumbe jengeni kwa spidi kubwa majengo yakamilike kwa uwakati na ubora”.  

Aidha, Dkt. Magufuli ametoa wito kwa Vyuo Vikuu nchini kuendelea kujiimarisha kutoa elimu bora hasa katika zama hizi ambapo nchi yetu inaeleka Uchumi wa kati kupitia viwanda ambapo sayansi na teknolojia ndio msingi wa maendeleo hayo na kuwataka wanafunzi kusoma kwa bidii na kujiepusha masuala yasiyo na msingi ili kuepuka kufeli na kupata maradhi ikiwemo ugonjwa wa ukimwi.

Awali akizungumza Waziri wa Elimu Syansi na Teknolojia Prof. Joyce Ndalichako amempongeza na kumshukuru Rais kwa kuipa Elimu kipaumbele na Kuwekeza kiasi kikubwa ikiwemo fedha za ujenzi wa Maktaba MUST, uwekezaji wa ,Shilingi Bilioni 3.8 kwa ajili ya ujenzi wa Jengo la Utawala na Madarasa Chuo Kikuu Mzumbe Kampasi ya Mbeya, Shilingi Bilioni 6.3 ujenzi wa hosteli za wanafunzi 1,024 Mzumbe Kampasi kuu Morogoro na shilingi Bilioni 9 kwa ajili ya ujenzi wa maabara mtambuka itokayochukua wanafunzi 1600 kwa wakati mmoja katika Chuo Kikuu Sokoine cha kilimo.

Ndalichako amesema fedha nyingine zilizotolewa lwa ajili ya sekta ya Elimu ni Shilingi bilioni 12 za ujenzi wa kituo cha umahiri cha magonjwa ya moyo na mishipa ya damu kikubwa katika Afrika Mashariki kinachojengwa katika Chuo kikuu cha Afya na Sayansi Shirikishi Muhimbili Kampasi ya Mlonganzila.   Waziri Ndalichako amemuhakikishia Mhe. Rais kuwa Wizara yake itasimamia kikamilifu miradi hiyo.

Wakitoa salamu, wakuu wa Vyuo Vikuu vya Mzumbe na MUST wameishukuru Serikali na kuahidi kuendelea kutoa mafunzo na kozi zinazoendana na wakati , huku changamoto kubwa ikiwa ni kuchelewa kupata idhibati ya kuendesha programu mbalimbali walizoomba kutoka Kamisheni ya Vyuo Vikuu (TCU).

Kufuatia hali hiyo Rais Magufuli amemuagiza Waziri kuhakikisha ndani ya siku 10 Mwenyekiti wa Bodi ya Tume ya Vyuo Vikuu Tanzania na wataalamu wake kutembelea Chuo cha Sayansi na Teknojia Mbeya ili kutoa majibu ya ithibati za kozi zilizoombwa.

Katika hatua ingine Rais Mhe. Dkt. Magufuli amemuagiza Mkuu wa Mkoa wa Mbeya kufuatilia ujenzi wa barabara kuelekea katika Chuo cha MUST ijengwe kwa haraka ili kulinda hadhi ya Chuo hicho.

Imetolewa na:

Kitengo cha Mawasiliano Serikalini
Wizara ya Elimu, Sayansi na Teknolojia
4/5/2019
Read 211 times

Video News

Contact

  • Name:    Permanent Secretary
  • Address: Block 10
  •               College of Business Studies and Law
  •               University of Dodoma (UDOM)
  •               P.O.Box 10
  •               Dodoma
  • Tel:        +255 26 296 3533
  • Email:    This email address is being protected from spambots. You need JavaScript enabled to view it.
  • Zonal SQA Offices Contacts
Top
We use cookies to improve our website. By continuing to use this website, you are giving consent to cookies being used. More details…